Banorët të kënaqur me rregullimin e rrugës

Mirashi Info 01.06.2013

Banorët të kënaqur me rregullimin e rrugës

Këtë të premte (31.Maj.2013) Kryetari i Komunës së Ferizajt, Agim Aliu, së bashku me Drejtorin e Drejtorisë së Planifikimit, Zhvillimit dhe Rindërtimit Ardian Ferizin dhe deputetin e Kuvendit të Komunës Gazmend Bytyqin, kanë inspektuar nga afër punimet që po realizohen në projektin e rrugës në fshatin Mirash.

Banorët e fshatit Mirashë falë Komunës së Ferizajt, janë në përfundim të infrastrukturës së tyre të nevojshme për të bërë jetë normale në fshatin e tyre. Ky fshat është bërë me rrjet të kanalizimit, ka ambulancën e fshatit dhe tashmë po bëhet edhe rregullimi i rrugës së tyre.

Për të parë nga afër punimet e rrugës e cila shumë shpejt pritet të asfaltohet, këtë të premte doli edhe Kryetari i Komunës së Ferizajt, Agim Aliu së bashku me bashkëpunëtorët e tij.

Në një prononcim për gazetarët lidhur me ecurinë e punimeve të kësaj rruge foli Drejtori i Drejtorisë së Planifikimit, Zhvillimit dhe Rindërtimit Ardian Ferizi. Ai projektin e rrugës së këtij fshati e ka vlerësuar tejet lart.

“Është një projekt prej 1.2 kilometra gjatësi, ka kushtuar rreth 114 mijë euro. Asfaltimi i kësaj rruge do të bëhet  pas analizave tjera të ngjeshmërisë për të verifikuar,  a është bërë ashtu siç është përshkuar edhe në kontrata para se të vendoset shtresa e asfaltit”, tha Ferizi.

Ky projekt i rrugës në fshatin Mirash është në vazhdën e shumë projekteve që po realizohen në Komunën e Ferizajt.

Nga ana tjetër, Deputeti në Kuvendin e Komunës së Ferizajt nga fshati Mirash Gazmend Bytyqi, ka thënë se kjo rrugë ka rëndësi jetike për banorët e këtij fshati.

“Nuk është kjo rrugë që është bërë  e vetme në këtë fshat që nga viti 2009, kemi bërë kanalizimin i cili është bërë edhe me një fazë plotësuese, kemi investuar në ambulancën e fshatit dhe tani më jemi pothuajse në fazën e finalizimit të projekteve në mënyrë që qytetarët e  fshatit Mirash t’i ofrojmë jetë sa ma të avancime se ma të qetë “, është shprehur Bytyqi.

Është bërë e ditur së në fshatin Mirash jetojnë mbi 2 mijë banorë.