Vetëvendosje, për një bujqësi të zhvilluar

Kosova Info, Ferizaj, 24 prill 2012

 Sot, duke filluar nga ora 13:00, Lëvizja VETËVENDOSJE! ka vazhduar aktivitetin e saj parazgjedhor për kryetar komune të Ferizajt. Radhën e kishte bujqësia dhe problemet e fshatit. Kandidati i Lëvizjes VETËVENDOSJE! për kryetar komune Faton Topalli, i shoqëruar nga nënkryetari i Lëvizjes Shpend Ahmeti dhe nënkryetarja Aida Dërguti, bashkë me një grup aktivistësh e qytetarësh kanë vizituar fshatin Mirash, për të mësuar nga afër problemet me të cilat përballen bujqit e blegtorët e komunës sonë.

Me të mbërritur në këtë fshat piktoresk, edhe syri më i rëndomtë i vëren mundësitë që këtij fshati i ka dhënë natyra për zhvillimin e bujqësisë e blegtorisë.

Në hyrje të fshatit takuam Idriz Lohajn, një fermer nga ky fshat që po kulloste bagëtitë. Idrizi bujqësinë e blegtorinë i kishte traditë familjare. Kishte 200 krerë qengja që me gjithë kujdesin e përkushtimin e tij, nuk arrinte dot të përfitojë nga shitja e tyre. “Qeveritë e shteteve fqinje po i subvencionojnë më shumë fermerët e tyre, si rezultat i kësaj ato po dalin me çmime më të lira në treg, e neve këndej, Qeveria jonë nuk po na e mbron tregun”, tha Idrizi shkurt e shqip, atij ekonominë ia kishte mësuar jeta.

Shkuam edhe në stallën e tij, i pamë nga afër kushtet e vështira në të cilat ai e mban bagëtinë. Prej tij mësuam se subvencionimi për bagëtitë nga ana e komunës sivjet ka zbritur përgjysmë krahasuar me vitin e kaluar, nga 10 euro në 5 euro. Ai na tregoi se dikur në fshatin Mirash banorët e këtij fshati kishin gjithsej 2000 krerë dele, ndërkaq sot numëron vetëm 350 sish.

Idrizi merrej edhe me të mbjellat. I kishte 10 hektarë të mbjellë me grurë, e pengesat nuk ishin më të vogla as këtu. I kishte dy makina shirëse (auto – kombajna) për të korrurat e nuk po ia dilte dot me derivatet. Ishte subvencionimi i naftës kërkesa e tij për kandidatin tonë Faton Topalli. Ai e dinte fare mirë se interesi kreditor për bujqësi në vendet perëndimore ishte 1,5 deri në 2,5%, ndërkaq në Kosovë ky interes arrin shifrën prej 24%.

Kandidati i Lëvizjes VETËVENDOSJE! për kryetar komune, Faton Topalli në bashkëbisedim me fshatarët e Mirashit tregoi se sektori i bujqësisë është një nga sektorët që i është kushtuar rëndësi e veçantë ne përpilimin e programit qeverisës për komunën e Ferizajt. Në pika të shkurtra ai shpalosi para tyre orientimet kryesore për zhvillimin e bujqësisë. Tri janë shtyllat kryesore ku programi ynë do të ndërhyjë për ta ndryshuar rrjedhën aktuale të gjërave: dyfishimi i subvencioneve, hapja e një zyre për orientim dhe këshillim dhe subvencionimi i produkteve strategjike. E para mund të bëhet shumë lehtë vetëm me kursime që Lëvizja jonë do të bëjë kur do ta ndalojmë luksin e salltanetin e pushtetarëve. 740 mijë euro mund të kursehen vetëm duke shmangur keqpërdorimet e korrupsionin në komunë. Zyra për orientimin dhe këshillimin bujqësor do të përbëhet prej agronomëve dhe ekonomistëve. Ajo do t’i vizitojnë bujqit për t’iu dhënë këshilla profesionale, por e njëjta do ta studiojë tregun për t’i udhëzuar ata se në cilën kulturë bujqësore është më e leverdishme të investojnë. Ndërkaq, varësisht nga studimi i kërkesës, komuna do të subvencionojë produktet strategjike.

Pas kandidatit Faton Topalli, fjalën e mori Shpend Ahmeti, nënkryetar i Lëvizjes VETËVENDOSJE!. Shpendi tregoi se nga mbarë buxheti i Kosovës, zhvillimit të bujqësisë i është ndarë vetëm 1,5% e këtij buxheti, ndërkohë që dihet mirëfilli se mbi gjysma e popullsisë së Kosovës jeton në fshat. Pushteti në Kosovë flet shumë për vlerat evropiane e integrimin, por ndryshe nga Qeveria në Kosovë, 1/3 e buxhetit evropian i ndahet bujqësisë. Lëvizja VETËVENDOSJE! e ka bujqësinë prioritet, si në nivelin qendror, po ashtu edhe në atë lokal për komunën e Ferizajt. /KI/