Ferizaj: Vetëvendosjes nuk iu lejua tubimi në shkollë

Koha Ditore

Publikuar: 04.02.2012 - 21:40

Ferizaj, 4 shkurt – Të shtunën,  rreth orës 19.00 në shkollën fillore “Ali Hadri, në fshatin Mirash të komunës së Ferizajt, aktivistë të Lëvizjes Vetëvendosje! nuk janë lejuar të mbajnë tubimin që ishte parashikuar me banorët, njofton kjo lëvizje nëpërmjet një komunikate.

Aktivistët e Vetëvendosjes para Shkollës në Mirash  (foto: Youtube)

Sipas komunikatës, ditë më parë Qendra e Lëvizjes Vetëvendosje! Ferizaj kishte ndjekur procedurat e kërkuara dhe kishte marrë leje nga drejtori i arsimit të Komunës, Agim Berisha.  Por, megjithatë drejtori i shkollës fillore në këtë fshat, Bashkim Bytyçi  edhe pasi u informua për lejen e marrë nga drejtoria e arsimit të komunës Ferizaj nuk ka lejuar mbajtjen e këtij tubimi në hapësirat e shkollës.  Arsyetimi ishte se: "nuk i lejon subjektet politike të mbajnë takime në shkollën e tij".

Në këtë tubim, ndër të tjerë, ishte paraparë të merrnin pjesë edhe nënkryetari e Vetëvendosjes,  Shpend Ahmeti dhe kryetari i Qendrës së vetëvendosjes në Ferizaj, Faton Topalli, të cilët pasi që  nuk u lejuan ta mbanin tubimin e njoftuar në ambientet e shkollës fillore folën me pjesëmarrësit në oborrin e shkollës duke premtuar  se: "do të kthehemi sërish te i njëjti vend për të mbajtur tubimin me ju".